Кондак 1

Возбрани врагом нашим озлобляти нас и от Господа нашего отлучати конечне и научи нас пети Тебе, Богородице, весело:

Радуйся, от горя, бед и гибели спасающая нас, бедствующих Избавительнице.

Икос 1

Ангелов множество по Твоему, Мати наша, повелению ополчаются на избавление наше грозно, Ты же приими молитву сию:

Радуйся, ангелов на спасение наше посылающая; радуйся, Царице горних чинов, небесную их помощь нам дарующая.

Радуйся, ангелом хранити нас повелевающая; радуйся, воинством ангельским врагов наших поражающая.

Радуйся, от горя, бед и гибели спасающая нас, бедствующих Избавительнице.

Кондак 2

Видят бедствующии толикую и многую помощь Твою сердечно Тя призывающим и наставляются тем пети Сыну Твоему непрестанно: Аллилуиа.

Икос 2

Разумеют мнози, яко мирови Тя дарова Сын Твой Избавительницу бедствующим, темже поем Тя сице:

Радуйся, бедствующих Мати; радуйся, страждущих утешение.

Радуйся, болящих исцеление; радуйся, ненадежных надеждо.

Радуйся, от горя, бед и гибели спасающая нас, бедствующих Избавительнице.

Кондак 3

Сила Вышняго даровася Ти на помощь и спасение миру и нас, в бедах погибающих. И кто Тобою не избавлен бысть, и кто не поет Сыну Твоему: Аллилуиа.

Икос 3

Имущи непостижимую любовь к роду человечу, кая воздыхания не прияла еси, кия слезы не отерла еси, и кого не принудила еси призывати Тя? Темже приими от нас похвалы сия:

Радуйся, бедствующих скорое услышание; радуйся, погибающих известное спасение.

Радуйся, печальных и скорбных утешение; радуйся, плененных свобождение.

Радуйся, от горя, бед и гибели спасающая нас, бедствующих Избавительнице.

Кондак 4

Буря несчастий налете на ны, спаси убо нас погибающих, спаси, Избавительнице наша, бурю погибельную на земли Укротившаго показующая нам и приемлющаго нашу песнь: Аллилуиа.

Икос 4

Слышаша человечестии роди всю Твою к Христианом дивную любовь и Твое мощное избавление их от всяких находящих на них лютых, научишася пети Тебе:

Радуйся, человеческаго рода от бед избавление; радуйся, бурь житейских прекращение.

Радуйся, уныния прогонительнице; радуйся, радости по скорби нам подательнице.

Радуйся, от горя, бед и гибели спасающая нас, бедствующих Избавительнице.

Кондак 5

Боготечней звезде подобящися, мрак и темноту в грехолюбивых сердцах разгоняеши, да во свете Твоея любве узрят Господа и воспоют Ему: Аллилуиа.

Икос 5

Видеша людие российстии Твое не чаянное от многоразличных бед избавление, радостно поют Тебе сице:

Радуйся, в бедах наша помощнице; радуйся, скорбей наших отъятие.

Радуйся, печалей наших отгнание; радуйся, в скорбех наших утешение.

Радуйся, от горя, бед и гибели спасающая нас, бедствующих Избавительнице.

Кондак 6

Проповедуют помощь Твою и любовь Твою, Мати, исцеленнии, утешеннии, обрадованнии и спасеннии Тобою от бед и поют Твоему высокодержавному Сыну: Аллилуиа.

Икос 6

Возсия нам свет спасения во мгле погибели, окружившей нас, и настави пети Тебе, Владычице:

Радуйся, мрак душ наших просвещающая; радуйся, тьму греховную потребляющая.

Радуйся, светом радости души ободряющая; радуйся, мглу греха разгоняющая.

Радуйся, от горя, бед и гибели спасающая нас, бедствующих Избавительнице.

Кондак 7

Хотящим нам конечному отчаянию предатися, отвсюду бедам належащим, помыслихом о Тебе, Избавительнице, и ободрихомся, и утешихомся, поюще Сыну Твоему: Аллилуиа.

Икос 7

Новую и нежданную показала еси нам милость Свою, под державную руку Твою нас восприимши, и отвсюду вопием Ти, Богородице:

Радуйся, Царице державная: радуйся, и нас под Твою державу восприявшая.

Радуйся, защиту Твою нам даровавшая; радуйся, врагов наших поразившая.

Радуйся, от горя, бед и гибели спасающая нас, бедствующих Избавительнице.

Кондак 8

Странное чудо: на погибель обреченнии и в нуждах томящиися безчисленных, внезапу спасение и избавление получают от Тебе, поюще Богу: Аллилуиа.

Икос 8

Вси сущии во мраце скорбей, вси обуреваемии несчастий бурею, приидите к доброму пристанищу и нашему поможению, покрову Девы Избавительницы, вопиюще Ей:

Радуйся, радостей источниче; радуйся, печалей прогнание.

Радуйся, бед избавление; радуйся, всяческаго покоя подательнице.

Радуйся, от горя, бед и гибели спасающая нас, бедствующих Избавительнице.

Кондак 9

Все существо человеческое хвалит Тя, вси воспевают Тя, многоразличное избавление им несущую, вместо печалей радость подающую поющим Сыну Твоему и Богу: Аллилуиа.

Икос 9

Витии многоумнии обезумеша, видяще Твое скорое чудесное от бед страждущих избавление, и умолкоша, нам поющим Ти:

Радуйся, чудесы мир удивившая; радуйся, чудесы нас укрепившая.

Радуйся, безбожие чудесами истребившая; радуйся, врагов силою Божиею посрамившая.

Радуйся, от горя, бед и гибели спасающая нас, бедствующих Избавительнице.

Кондак 10

Спасти хотя всяку душу человечу, всею любовию печешися о ней, дондеже научиши ю пети Сыну Твоему: Аллилуиа.

Икос 10

Стеною мир христианский хранящая и всяку душу от врагов ограждающая явися икона Твоя, Избавительнице, в мире православном и чудесы прославися, Тебе людем Божиим воспевающим:

Радуйся, наставнице наша; радуйся, Избавительнице наша.

Радуйся, веселие наше; радуйся, вечная радосте наша.

Радуйся, от горя, бед и гибели спасающая нас, бедствующих Избавительнице.

Кондак 11

Пение непрестанно приносим Ти, Владычице, Тобою избавленнии и Тобою паки радость обретшии и Божественному Сыну Твоему поющии радостно: Аллилуиа.

Икос 11

Светосияющим светилом лучезарным во мраце греха явися нам икона Твоя, Избавительнице, наставляющая нас пети Тебе:

Радуйся, от глада нас избавляющая; радуйся, вредоносящее естество от растений отгоняющая.

Радуйся, посевы и леса и все растущее от погибели спасающая; радуйся, земледельцев скорбящих утешение и труда их благословение.

Радуйся, от горя, бед и гибели спасающая нас, бедствующих Избавительнице.

Кондак 12

Благодать от иконы Твоея, Избавительнице, текущая, исцелений струи подающая и сердца веселием оживляющая, побуждает всех волею пети, Мати, Сыну Твоему и Богу: Аллилуиа.

Икос 12

Воспеваем исцеления, от святыя иконы Твоея бываемая, воспеваем наипаче воскресение Анастасия отрока и воспевающе поем:

Радуйся, мертвых воскрешающая; радуйся, умершия сердца оживляющая.

Радуйся, от смерти и вечнаго огня изымающая; радуйся, посмертное наше упование и защито.

Радуйся, от горя, бед и гибели спасающая нас, бедствующих Избавительнице.

Кондак 13

О всепетая, вселюбимая наша Мати! Умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу, прощающему нас: Аллилуиа.

Этот кондак читается трижды, затем 1-й икос «Ангелов множество …» и 1-й кондак «Возбрани врагом …».

Молитва

О Мати Божия, помоще наша и защито, присно буди нам Избавительница, на Тя бо уповаем и всегда вседушно Тя призываем, умилосердися и помози, пожалей и избави, приклони ухо Твое и наша скорбныя и слезныя молитвы приими, и якоже хощеши успокой и обрадуй нас, любящих Твоего возлюбленнаго Сына, Емуже слава, честь и поклонение, со Отцем и Святым Духом, во веки веков. Аминь.

Тропарь, глас 4

Яко пресветлая звезда, просия Божественными чудесы святой образ Твой, Избавительнице, лучами благодати и милосердия Твоего озарив в нощи скорбей сущих. Подаждь убо и нам, Всеблагая Дево, избавление от бед, исцеление недугов душевных и телесных, спасение и велию милость.

Кондак, глас 8

Ко иконе Твоей, Пресвятая Госпоже, бедствовавшии с верою притекше, заступлением Твоим избавишася от злых, но, яко Мати Христа Бога, и нас свободи от лютых обстояний, временных и вечных, да зовем Ти: радуйся, Избавительнице наша от всех бед.

Величание

Величаем Тя, Пресвятая Дево, богоизбранная Отроковице, и чтим образ Твой святый, имже точиши исцеления всем с верою притекающим.