Барская икона Пресвятой Богородицы

Барская икона Пресвятой Богородицы - древний образ византийского письма из Барского монастыря Подольской епархии. Икона издавна свято чтится православными и католиками. Торжественное празднование установлено с 1887 года.











 

Конда́к 1.

Избра́нной пре́жде все́х ве́к предве́чным сове́том Пресвяты́я Тро́ицы во освяще́нное селе́ние Бо́га Сло́ва Преблагослове́нней Цари́це Богоро́дице ди́вней в зача́тии, ди́вней в житии́ и ди́вней в преставле́нии похва́льное сие́ дерза́ем принести́ пе́ние: Ты́ же, Влады́чице, иму́щая держа́ву непобеди́мую, приими́ гла́сы ра́б Твои́х, благогове́йно зову́щих Ти́: Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

И́кос 1.

А́нгелов и арха́нгелов со́нмы, окружа́ющии престо́л Бо́жий, со стра́хом взира́ют на блиста́ние сла́вы Твоея́, е́ю же просла́ви и превознесе́ Тя́ изво́ливый воплоти́тися от Тебе́ Госпо́дь. Но Ты́, я́ко влады́чествующая небе́сными и земны́ми, и на ми́р земны́й простира́еши лучи́ Своея́ благода́ти, е́ю же и стране́ Подо́льстей благоволи́ла еси́ дарова́ти во утеше́ние святу́ю ико́ну Твою́, со́лнечною све́тлостию и милосе́рдием Твои́м сия́ющую. Мы́ же, во изобра́жении се́м зря́ще Тя́, держа́щую в де́вственных объя́тиях Твои́х Боже́ственнаго Младе́нца Христа́ Го́спода, ра́дости исполня́емся, ве́рою поклоня́емся и со умиле́нием зове́м такова́я:
Ра́дуйся, чрез ико́ны Твоя́ пролива́ющая на зе́млю то́ки благода́ти;
Ра́дуйся, в подо́биих лица́ Твоего́ ве́рными, я́ко в зерца́лех, ве́рою зри́мая.
Ра́дуйся, подо́биям Твои́м животво́рную си́лу чуде́с дарова́вшая;
Ра́дуйся, благода́ть и си́лу Свою́ первопи́санней ико́не Свое́й изли́вшая.
Ра́дуйся, моли́твы христиа́нския пред о́бразом Твои́м приноси́мыя благоутро́бно прие́млющая;
Ра́дуйся, от высо́т небе́сных и до после́дних земли́ лучи́ Твоего́ милосе́рдия простира́ющая.
Ра́дуйся, я́ко Ма́терь, ча́д Твои́х правосла́вных назира́ющая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 2.

Ви́дящи Держа́вная Засту́пница от небе́снаго Своего́ жили́ща, быва́емыя на земли́ ско́рби, я́ко сердобо́льная Ма́терь, хотя́щи дарова́ти отра́ду бе́дствующим, и страну́ Подо́льскую не лиша́ла еси́ зало́га любве́ Твоея́: оби́льными чудесы́ просла́вивши святу́ю Твою́ ико́ну, всю́ страну́ на́шу то́ю огражда́еши науча́ющи, благода́тно взыва́ти к Бо́гу: Аллилу́иа.

 

И́кос 2.

Разуме́ша вси́ о́крест гра́да Ба́рскаго живу́щии, я́ко вели́кое сокро́вище дарова́ся и́м в честне́й ико́не Твое́й, во все́х обстоя́ниих и смяте́ниих сию́ страну́ обурева́вших, ели́цы бо ко о́бразу Твоему́ притека́ху, те́х не посрами́ся упова́ние, сохране́нии же Твои́м покро́вом благода́рственно воспева́ху сицева́я:
Ра́дуйся, Ма́ти щедро́т и милосе́рдия;
Ра́дуйся, хода́тайствующая пред Сы́ном Твои́м о умире́нии ми́ра.
Ра́дуйся, Ея́же си́лою охраня́ется в чистоте́ ве́ра правосла́вная;
Ра́дуйся, от наше́ствия вра́жия лю́ди Твоя́ спаса́ющая.
Ра́дуйся, и среди́ огня́ бра́ннаго моля́щихся Тебе́ невреди́мы сохраня́ющая;
Ра́дуйся, моле́ния на́ша не отрева́ющая.
Ра́дуйся, хра́м се́й о́бразом Твои́м чу́дно украша́ющая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 3.

Си́лою Вы́шняго охраня́ема пре́жде оби́тель Твоя́ в Ба́рстем гра́де, свети́льник правосла́вия яви́ся пролива́ющ ти́хий све́т уче́ния Ева́нгельскаго в ю́ныя сердца́ предсужда́емых бы́ти па́стырьми слове́снаго ста́да Христо́ва. Они́ же, науще́нии пра́вилом и́стиннаго богоче́стия, утверди́ша в ве́ре отпа́дшия иногда́ в е́ресь лати́нскую, подви́гше и́х пе́ти чи́стым се́рдцем Бо́гу: Аллилу́иа.

 

И́кос 3.

И́мут в Тебе́ первоо́браз обе́та де́вственнаго правосла́вно и́ночествующия де́вы, пою́щу о Тебе́ пра́отцу Твоему́ Дави́ду: приведу́тся Царю́ де́вы в сле́д Ея́, и́скренния Ея́ приведу́тся Тебе́. Ра́достными душа́ми, нося́щи свещи́ де́вства, и́дут ли́ца честны́х и́нокинь в сле́д Тебе́, своея́ Цари́цы и Води́тельницы. Окрыля́емы венца́ ра́йскаго наде́ждою и держа́щися Твоея́ руководя́щия десни́цы, ве́руют, я́ко Тобо́ю введены́ бу́дут в хра́м Царе́в, иде́же со А́нгелы и пра́ведники воспою́т Тебе́ хвале́ния сия́:
Ра́дуйся, Боже́ственною сла́вою преукраше́нная;
Ра́дуйся, ря́сны златы́ми присноде́вства оде́янная.
Ра́дуйся, красото́ю смире́ния преиспещре́нная;
Ра́дуйся, во хра́ме Иерусали́мстем во Хра́м свя́т Сы́ну Бо́жию Себе́ приугото́вавшая.
Ра́дуйся, наше́ствием Ду́ха Свята́го па́че сло́ва Бо́га Сло́ва заче́ншая;
Ра́дуйся, проро́ки прорече́ннаго в де́вственней утро́бе Твое́й неизрече́нно поне́сшая.
Ра́дуйся, во спасе́ние и ра́дость всему́ ми́ру Христа́ Го́спода безсе́менно роди́вшая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 4.

Бу́рею жите́йских бе́д сотряса́еми, многови́дными печа́льми окружа́еми и тьмо́ю оскуде́ния ве́ры омрача́еми, к немерца́ющему све́ту любве́ от ико́ны Твоея́ сия́ющему притека́ем, Богома́ти, прося́щи от Тебе́ умире́ния ми́ра и просвеще́ния духо́внаго. Простри́, Блага́я Ма́ти, десни́цу Твою́ и поддержи́ на́с сла́бых и изнемога́ющих. Укрепи́ в борьбе́ с си́лами зло́бы и научи́ во смире́нии ду́ха за вся́ случа́ющаяся благодари́ти Бо́га пе́снию: Аллилу́иа.

 

И́кос 4.

Слы́шавше о благода́тных зна́мениях, быва́емых от святы́я Твоея́ ико́ны, сро́дницы боля́щия отрокови́цы притеко́ша в Ба́рскую оби́тель Твою́: и́хже моли́тву услы́шавши, яви́лася еси́, ми́лостивая Враче́бница, неду́гующей, с не́ю же исцеле́нною Твои́м милосе́рдием благода́рне воспева́ем Ти́:
Ра́дуйся, живы́й исто́чниче, источа́ющий прося́щим струи́ исцеле́ний;
Ра́дуйся, иде́же бо безси́льно врачевство́ земно́е, та́мо де́йствует па́че есте́ственная си́ла Твоея́ благода́ти.
Ра́дуйся, те́ми чудесы́ науча́ющая все́х с ве́рою к Тебе́ притека́ти;
Ра́дуйся, вся́ я́же ко бла́гу душе́вному проше́ния на́ша исполня́ющая.
Ра́дуйся, немощству́ющих с моли́твою к Тебе́ притека́ющих ми́лостивно исцеля́ющая;
Ра́дуйся, от высо́т небе́сных по́мощь земны́м незри́мо посыла́ющая.
Ра́дуйся, моля́щихся Тебе́ по си́ле ве́ры духо́вными дарова́нии обогаща́ющая;
Ра́дуйся, ди́вную ико́ну Твою́ в Зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 5.

Боготе́чная звезда́ бу́ди на́м, Влады́чице, показу́ющая пу́ть к го́рнему Иерусали́му, иде́же в непристу́пней сла́ве с Сы́ном Твои́м и Бо́гом ца́рствующая, слы́шиши от безпло́тных и пра́ведных пе́сенное хвале́ние, приноси́мое о Тебе́ Бо́гу: Аллилу́иа.

 

И́кос 5.

Ви́деша благочести́выя и́нокини оби́тели Ба́рския си́лу Твою́, Богома́ти, егда́ сестру́ и́х лю́те возболе́вшую принесо́ша ко многочти́мей ико́не Твое́й, моле́бная пе́ния соверша́юще и прося́ще облегче́ния стра́ждущей: сконча́вшуся же моли́твенному пе́нию, узре́ша боля́щую а́бие возста́вшу от одержа́вшаго ю́ неду́га. Те́м же ра́достию и стра́хом ве́лиим о бы́вшем чудеси́ тогда́ объя́ти бы́вше, со умиле́нием возпе́ша Тебе́, Пречи́стая Де́во:
Ра́дуйся, милосе́рдая Цели́тельнице;
Ра́дуйся, бла́гостная Вразуми́тельнице.
Ра́дуйся, любвеоби́льная Врачева́тельнице неду́гов теле́сных и душе́вных;
Ра́дуйся, правосу́дие с ми́лостию разтворя́ющая.
Ра́дуйся, стра́хом Бо́жиим на́с вразумля́ющая;
Ра́дуйся, ка́ющихся милосе́рдием Бо́жиим ободря́ющая.
Ра́дуйся, на покая́ние вре́мя на́м от пра́веднаго Судии́ испроша́ющая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 6.

Пропове́дница благодея́ний Твои́х яви́ся отрокови́ца очи́ма боле́вшая, ю́же пома́занием еле́я от Твоея́ святы́я ико́ны исцели́ла еси́: те́м же в во́зраст прише́дши, на вся́ко ле́то посеща́ше Ба́рскую оби́тель Твою́ в де́нь то́й, в о́нь же соверши́ся ея́ исцеле́ние, и благода́рно поя́ше Бо́гу: Аллилу́иа.

 

И́кос 6.

Возсиява́ет на́м свяще́нная ико́на Твоя́ Богоневе́сто, я́ко луна́ по́лная, освеща́ющи на́м кро́тким сия́нием святы́ни жи́зненный пу́ть, в но́щи попече́ний жите́йских блужда́ющим. Во све́те у́бо Твое́м да у́зрим све́т немерца́ющий в селе́ниих го́рних, иде́же сподо́би на́с восхвали́ти Тя́, наста́вницу и руководи́тельницу на́шу, песнесло́вии си́ми:
Ра́дуйся, Держа́вная Прави́тельнице, житие́ на́ше до́бре пра́вящая;
Ра́дуйся, приме́ром жития́ Своего́ к доброде́ланию на́с поощря́ющая.
Ра́дуйся, ра́дости земны́я а́ки со́н вменя́ти поуча́ющая;
Ра́дуйся, ско́рби я́ко вре́менныя в терпе́нии носи́ти укрепля́ющая.
Ра́дуйся, огне́м теле́сных боле́зней ржу́ душе́вных скве́рн очища́ющая;
Ра́дуйся, во искуше́ниих кре́пко противостоя́ти врагу́ умудря́ющая.
Ра́дуйся, изнемога́ющим в борьбе́ благода́тную по́мощь ниспосыла́ющая;
Ра́дуйся, ди́вную ико́ну Твое́ю в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 7.

Хотя́ премилосе́рдый Госпо́дь яви́ти неизрече́нное вели́чие любви́ Своея́ к лю́дем, искупле́нным Его́ Честно́ю Кро́вию, дарова́ Тебе́, Присноде́вственней Ма́тери, си́лу охраня́ти прибега́ющих к Тебе́ в земно́й се́й жи́зни и защища́ти от духо́в зло́бы в преселе́нии к жи́зни ве́чней. Приноси́мыя же Це́рковию моли́твы о душа́х преста́вльшихся, споспеше́ствуемыя Твои́м хода́тайством, си́льны су́ть и от ве́чных изба́вити му́к. Вся́ сия́ благодея́ния, Тобо́ю явля́емая, помина́ющие, благода́рно воспева́ем Всеще́дрому Бо́гу: Аллилу́иа.

 

И́кос 7.

Но́вый недомы́сленный ра́й, име́яй посреде́ Себе́, я́ко Дре́во жи́зни все́х Го́спода, зри́м Тебе́, Пренепоро́чная, Богоро́дице Присноде́во. А́ще и обстоя́т Тя́ Херуви́мы, но не ору́жия пла́менная в рука́х держа́т, па́че же разли́чныя духо́вныя да́ры от Тебе́ раздаю́т все́м, невозбра́нно притека́ющим в о́нь. Окрыля́еми у́бо таково́ю наде́ждою, и мы́ дерза́ем велича́ти Тя́, Богора́дованная Цари́це, благохвале́ньми сицевы́ми:
Ра́дуйся, на небеси́ ца́рствующая и земноро́дных любо́вию не оставля́ющая;
Ра́дуйся, от все́х тва́рей небе́сных и земны́х превозноси́мая.
Ра́дуйся, сия́ния Боже́ственнаго све́та лучеза́рно на всю́ вселе́нную простира́ющая;
Ра́дуйся, неизрече́нным благоуха́нием Ду́ха Свята́го благоуха́ющая.
Ра́дуйся, душе́вную нечистоту́ на́шу Твои́м хода́тайством чрез и́стинное покая́ние очища́ющая; Ра́дуйся, Та́инствами Святы́я Це́ркве Бо́гу на́с присвоя́ющая.
Ра́дуйся, во́инствующим на стра́сти свы́ше побе́ду подаю́щая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 8.

Стра́нствующим в плаче́вней юдо́ли земно́й бу́ди на́м, о Богома́ти, благода́тная Путеводи́тельнице, да не заблуди́м от пути́ пра́ваго, веду́щаго к Небе́сному Оте́честву: не и́мамы бо ины́я па́че Тебе́ верне́йшия наста́вницы. Сама́ у́бо упра́ви жи́знь на́шу во спасе́ние и научи́ Ду́хом и И́стиною пе́ти Бо́гу: Аллилу́иа.

 

И́кос 8.

Вся́ добра́ еси́ Бли́жняя Моя́, и поро́ка не́сть в Тебе́, предрече́ о Тебе́ Ду́х Святы́й в словесе́х прему́драго проро́ка и царя́: Тебе́, непоро́чную, воспева́ют А́нгели, хва́лят проро́цы, пропове́дуют апо́столи, сла́вят му́ченицы, богосло́вствуют святи́тели, ублажа́ют преподо́бнии и вся́ко дыха́ние превозно́сит. Мы́ же, гре́шнии, ку́ю хвалу́ Тебе́ принесе́м, недоумева́ем и ужаса́емся; оба́че любо́вию Твое́ю побежда́еми дерза́ем недосто́йнии воспе́ти вели́чествию Твоему́:
Ра́дуйся, та́йных цвето́в прекра́сный су́щий Раю́;
Ра́дуйся, голуби́це, псало́мски междора́мий сия́ющая.
Ра́дуйся, чистото́ю облагода́тствованнаго де́вства блиста́ющая;
Ра́дуйся, глубоча́йшаго смире́ния животво́рный кла́дязю.
Ра́дуйся, послуша́ния во́ле Бо́га Отца́ ди́вный о́бразе;
Ра́дуйся, богоподо́бныя любве́ неисчерпа́емый исто́чниче.
Ра́дуйся, прекра́сное все́х доброде́телей соверше́ние;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 9.

Вся́кия ско́рби и бе́ды отжени́ всемо́щною Твое́ю си́лою от притека́ющих ко святе́й ико́не Твое́й, Обра́дованная. Обыдо́ша бо на́с мно́гая зла́я гре́х ра́ди на́ших, окружи́ша врази́ ви́димыя и неви́димыя. Ты́ же, я́ко Взбра́нная Воево́да, ускори́ на по́мощь на́шу и от все́х зо́л защити́, да спасе́ннии Тобо́ю в ми́ре и тишине́ пое́м Спаси́телю Бо́гу: Аллилу́иа.

 

И́кос 9.

Вити́и духо́внии, па́стыри Це́ркве Христо́вы, окружа́юще просла́вленную чудесы́ и зна́мении свяще́нную ико́ну Твою́, я́коже цвета́ми украша́ют ю́ пе́сенными славосло́вьми, с ни́ми же и мы́, притека́юще к не́й, прино́сим Тебе́, Пречи́стая Влады́чице, смире́нная моле́ния на́ша, глаго́люще:
Ра́дуйся, я́коже би́сер честны́й хвалы́ от чи́стых у́ст прие́млющая;
Ра́дуйся, правосла́вныя ве́ры и́стинное испове́дание чу́дно утвержда́ющая.
Ра́дуйся, святи́телем, богому́дре пра́вящим па́ству свою́, вене́ц апо́стольский уготовля́ющая; Ра́дуйся, пеку́щихся о ста́де Христо́вем па́стырей награ́ды ве́чныя сподобля́ющая;
Ра́дуйся, ка́ющихся гре́шников любо́вию Твое́ю незри́мо объе́млющая;
Ра́дуйся, моле́ниям о по́мощи в борьбе́ с пло́тию бла́гостно вне́млющая.
Ра́дуйся, притека́ющих к Тебе́ от страсте́й теле́сных избавля́ющая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 10.

Спасе́ния приста́нище ти́хое зри́тся хра́м се́й в о́ньже прибега́ют утомле́ннии пла́ванием в бу́рнем мо́ре жите́йстем: да зде́ пред свяще́нною ико́ною Твое́ю сложи́вше тяготя́щая и́х душе́вная бремена́, прии́мут от Тебе́ си́лу к продолже́нию пути́ жи́зненнаго и воспою́т облегче́нною душе́ю свяще́нную пе́снь: Аллилу́иа.

 

И́кос 10.

Царя́ Небе́снаго па́че сло́ва ро́ждшая Богоневе́сто и те́м ны́не на Небесе́х превы́ше все́х ви́димых и неви́димых превознесе́нная! Не отыми́ от на́с Ма́терняго покро́ва Твоего́ и не лиши́ заступле́ния Твоего́, но вся́ поле́зная да́руй благогове́йно вопию́щим Тебе́ пред честно́ю Твое́ю ико́ною:
Ра́дуйся, виде́нием изображе́ннаго на ико́не ди́внаго ли́ка Твоего́ благода́тне сердца́ на́ша к Себе́ привлека́ющая;
Ра́дуйся, зре́нием о́браза Твоего́ вся́ ско́рби земна́я забыва́ти помога́ющая.
Ра́дуйся, ве́рность Тебе́ храня́щих в жи́зни се́й благода́тно награжда́ющая;
Ра́дуйся, в ве́чных оби́телех насле́дие на́м дарова́ти обеща́ющая.
Ра́дуйся, иере́ев благогове́йно Тебе́ служа́щих та́йным да́ром и́стинныя моли́твы обогаща́ющая; Ра́дуйся, смире́нным душа́м руководи́тельство бли́жних вруча́ющая.
Ра́дуйся, безро́потно проходя́щих послуша́ния венце́м испове́дничества увенча́ющая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 11.

Пе́ние сие́ хвале́бное дерзну́хом принести́ Тебе́, Влады́чице: а́ще и недосто́йнии, пред чудотво́рною Твое́ю ико́ною, па́мятуем бо, я́ко ю́ношу, мно́гия дни́ лю́те страда́вшаго, а́бие исцели́ла еси́ по моли́тве к Тебе́ во оби́тели Ба́рстей. Того́ ра́ди вси́ припа́даем к Тебе́, тве́рдую иму́ще наде́жду, я́ко Ты́ благоутро́бием Твои́м уста́ на́ша очи́стише оскудева́ющая возпо́лниши и научи́ши досто́йно воспева́ти чудоде́йствующему Тобо́ю Бо́гу: Аллилу́иа.

 

И́кос 11.

Светоно́сный черто́г воплоти́вшагося от Тебе́ Бо́га Вседержи́теля была́ еси́, боголе́пная Де́во Мари́е. Ты́ бо от челове́к прозя́бшая, но ро́ждшая Влады́ку, явля́ешися Небе́сная Две́рь, вводя́щая на́с в го́рний черто́г. Да́руй же все́м на́м, о Всепе́тая Ма́ти, оде́жду душе́вную све́тлу, в не́й же досто́ит вни́ти на ве́черю А́гнчу, да не изве́ржени бу́дем от черто́га Христо́ва, я́ко же не иму́щи одея́ния бра́чна. Ны́не же сподо́би на́с благогове́йно воспе́ти Тебе́ пред свято́ю Твое́ю ико́ною:
Ра́дуйся, мы́сленное Не́бо, возсия́вшее на́м Со́лнце пра́вды Христа́;
Ра́дуйся, раю́ прозя́бший безсме́ртный Цве́т нетле́ния Жизнода́вца Иису́са.
Ра́дуйся, благослове́нная Же́но, Ея́же се́мя главу́ зми́я попра́;
Ра́дуйся, наслажда́ющаяся ны́не зре́нием Ца́рства Сы́на Твоего́.
Ра́дуйся, гро́зная Победи́тельнице си́л льсти́ваго миродержи́теля;
Ра́дуйся, Ея́же по́мощию да́руется на́м кре́пость на попра́ние искуси́теля.
Ра́дуйся, в небе́сных оби́телех насле́дие лю́бящим Тя́ обеща́ющая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 12.

Благода́тною си́лою Твоего́ мо́щнаго влады́чества посети́ на́с, Держа́вная Храни́тельнице на́ша, в лю́тую сию́ годи́ну губи́тельнаго неве́рия, тлетво́рных ересе́й. Повели́ тме́ отступи́ти от боголюби́выя страны́ на́шея, да́руй же все́м на́м непреста́нно мы́слию возноси́тися в страну́ Ве́чнаго Све́та, иде́же Ты́ спрославля́ешися с Сы́ном Твои́м и Бо́гом на́шим, Ему́ же вся́ го́рняя во́инства с тре́петом пою́т: Аллилу́иа.

 

И́кос 12.

Пою́ще Твое́ человеколю́бное заступле́ние, и́м же покрыва́еши на́с в наше́дшую годи́ну искуше́ний, мо́лим Тя́, Препросла́вленная Власти́тельнице вся́каго дыха́ния, пред чу́дною Твое́ю ико́ною, не отри́ни на́с от Твоего́ лица́ и в гряду́щая ле́та, но честны́м покро́вом Твои́м не преста́й покрыва́ти рабо́в Твои́х, немо́лчно Тебе́ воспева́ющих:
Ра́дуйся, огра́до на́ша неразруши́мая;
Ра́дуйся, попечи́тельнице о на́с неутоми́мая.
Ра́дуйся, подаю́щая на́м к земно́му житию́ вся́ потре́бная;
Ра́дуйся, вводя́щая лю́бящих Тя́ в селе́ния небе́сная.
Ра́дуйся, после́дняго ро́да и́ноков скорбьми́ и боле́зньми спаса́ющая;
Ра́дуйся, страда́льцем за ве́ру и благоче́стие ве́чное весе́лие и поко́й уготовля́ющая.
Ра́дуйся, рукописа́ние гре́х на́ших Твое́ю вла́стию разтерза́ющая;
Ра́дуйся, ди́вную ико́ну Твою́ в зна́мение ми́лости Твоея́ на́м дарова́вшая.
Ра́дуйся, Влады́чице, оби́тели Ба́рския похвало́ и всего́ ми́ра утвержде́ние.

 

Конда́к 13.

О, всепе́тая Ма́ти, Пречи́стая Де́во, испо́лненная боже́ственныя благода́ти! Под Твою́ всеще́друю ми́лость и святы́й омофо́р Тво́й с наде́ждою прибега́ющих сподо́би благода́ти Сы́на Твоего́. Отве́рзи на́м, христиа́ном, две́ри милосе́рдия: Тебе́ бо, гре́шнии, усе́рдно про́сим и ру́ки на́ша вси́ благогове́йно к Тебе́ возно́сим: поми́луй на́с, со умиле́нием пою́щих Святе́йшему Сы́ну Твоему́: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

 

Моли́тва Пресвятой Богородице пред иконой «Барская»

Богопросла́вленная, всеми́рне воспева́емая Госпоже́ Ма́ти Вседержи́телева Богоро́дице Мари́е! Приими́ на́шу сию́ от полноты́ серде́ц лю́бящих Тя́ приноси́мую Тебе́ пред свято́ю Твое́ю ико́ною моли́тву. Я́коже до сего́ дне́ и ча́са ми́лостиво покрыва́ла еси́ вся́ лю́ди, притека́ющия в хра́м се́й, та́ко и в пре́дняя благоспоспеши́ на́м во все́х де́лех и начина́ниих на́ших, я́же не возбраня́ют на́шему ве́чному спасе́нию. Ты́ ве́си не́мощь на́шу, зри́ши ско́рби, ну́жды и смуще́ния отовсю́ду находя́щия, но вся́ сия́ мо́жеши еди́ным то́кмо воззре́нием Твои́м умири́ти, а́ще то́кмо восхо́щеши помощи́ на́м. Ве́мы, я́ко гре́х ра́ди на́ших не́смы досто́йни милосе́рдия Твоего́, но Ты́, ро́ждшая Прише́дшаго в ми́р гре́шники спасти́, спаси́ и на́с, на вся́к де́нь и ча́с согреша́ющих. Укрепи́ сла́бую во́лю и немощно́е произволе́ние на́ше и оживотвори́ на́с ду́хом и́стиннаго покая́ния. Да та́ко очище́нии зде́ Твоего́ покро́ва досто́йни бу́дем и с горя́щим свети́льники доброде́телей в Страну́ Небе́сную пре́йдем невозбра́нно, иде́же сподо́бимся поклони́тися Тебе́, Пречи́стая Госпоже́, сла́вяще избра́вшую и возвели́чившую Тя́ Пресвяту́ю Тро́ицу, Отца́ и Сы́на, и Свята́го Ду́ха, во ве́ки веко́в. Ами́нь.
 

Моли́тва втора́я
Пресвятой Богородице пред иконой «Барская»

Пресвята́я Богоро́дице Де́во Влады́чице, вы́сшая А́нгел и Арха́нгел и всея́ тва́ри честне́йшая! Услы́ши на́с, моля́щихся Тебе́, и яви́ ми́лость Твою́ на лю́дех Твои́х. Помяни́, всеми́лостивая Госпоже́, предстоя́щия лю́ди и ра́ди благосло́вных ви́н оста́вльшихся поми́луй и́х и на́с по мно́жеству ми́лости Твоея́: сокро́вища и́х испо́лни вся́каго бла́га, супру́жества и́х в ми́ре и единомы́слии соблюди́, младе́нцы воспита́й, ю́ность наста́ви, ста́рость поддержи́, малоду́шныя уте́ши, расточе́нныя собери́, прельще́нныя вразуми́, стужа́емыя от духо́в нечи́стых свободи́, пла́вающим спла́вай и путеше́ствующим спутеше́ствуй, вдови́цам предста́ни, си́рых защити́, плене́нныя изба́ви, неду́гующия исцели́, на суди́щи и в руда́х, и в заточе́ниих и в го́рьких рабо́тах, и во вся́кой ско́рби и ну́жде, и в обстоя́нии су́щих облегчи́, возста́ви и поми́луй. Изря́днее же Це́рковь Сы́на Твоего́ соблюди́ и сохрани́ в долготу́ дни́й. Ты́ бо еси́, Госпоже́, наде́жда на́ша и засту́пница все́х притека́ющих к Тебе́ и Твоея́ святы́я по́мощи прося́щих. Те́м же всечестны́й о́браз Тво́й и руко́ю Твое́ю Держи́маго Вседержи́теля ви́дяще на ико́не, ра́дуемся гре́шнии с умиле́нием припа́дающе и любо́вию се́й целу́ем, ча́юще, Госпоже́, Твои́ми святы́ми Богоприя́тными моли́твами сподо́битися и небе́сныя безконе́чныя жи́зни, и непосты́дно ста́ти в де́нь су́дный одесну́ю Сы́на Твоего́ и Бо́га на́шего, сла́вяще Его́ ку́пно со Безнача́льным Отце́м и Пресвяты́м, и Благи́м, и Животворя́щим Ду́хом во ве́ки веко́в. Ами́нь.

Моли́тва тре́тья
Пресвятой Богородице пред иконой «Барская»

Прииди́те, лю́дие Росси́йстии, пресла́вно и правосла́вно ублажи́м Преблагослове́нную и Пречи́стую Мари́ю Де́ву, в Ба́ре гра́де благода́ть Свою́ издре́вле вы́ну яви́вшую, правосла́вныя лю́ди Подо́льския земли́ от ага́рян и сараци́н свободи́вшую, правосла́вную ве́ру в плене́нии лати́нстем сохрани́вшую. К кому́ у́бо прибе́гнем, а́ще не к Тебе́, Влады́чице! Кому́ принесе́м сле́зы и воздыха́ния, а́ще не к Тебе́, Пресвята́я Богоро́дице! Не и́мамы бо ины́я по́мощи, не и́мамы ины́я наде́жды, ра́зве Тебе́, Небе́сная Цари́це, Де́во Пречи́стая, Ле́ствице к Небеси́, свято́е Вмести́лище Сло́ва Бо́жия, прибе́жище ве́рным и избавле́ние, достоя́нию Твоему́ по́мощь и защище́ние, скорбя́щим Пода́тельнице ве́чнаго ра́дования, и́ноков богому́дрых возведе́ние к го́рнему Ца́рствию. Ты́ бо, я́ко иму́щая держа́ву непобеди́мую, злу́ю де́рзость лати́нскую отмсти́ла еси́, иезуи́тское и униа́тское неправове́рие в ве́ру правосла́вную обрати́ла еси́, ве́рою и́мя Твое́ всехва́льное призва́вших отце́в на́ших спасла́ еси́ и покры́ла и́х святы́м омофо́ром. Не отврати́ и ны́не рабы́ Твоя́ тщи́. Тя́ бо еди́ну наде́жду и́мамы; изба́ви лю́ди Твоя́ при́сно и гра́д и оби́тель, ю́же избра́ла еси́ Себе́ ме́стом проявле́ния благода́ти Твоея́, и Подо́льскую зе́млю и вся́ правосла́вныя христиа́ны от искуше́ний, от па́губных, душевре́дных уче́ний, от неве́рия, развраще́ния и поги́бели ве́чныя, и от вся́каго лю́таго обстоя́ния, и наве́тов враго́в Це́ркви Твоея́ правосла́вныя, и до ны́не та́йно и неуста́нно се́ющих скве́рныя пле́велы на до́брой, от ве́ка правосла́вной ни́ве Подо́льстей; а́ще бо не Ты́ предстоя́ла моля́щи, кто́ бы изба́вил ве́ру отце́в на́ших от толи́ких бе́д, кто́ бы и на́с сохрани́л до ны́не свобо́дны? Мы́ же преблаго́му Твоему́ заступле́нию о на́с ра́дующеся, изба́вльшеся от злы́х, благода́рственно да воспису́ем Ти́ и да зове́м Ти́: Ра́дуйся, Неве́сто Неневе́стная.